ANGGANG NANG PANGHABISAN ?( Monolog Bahasa Banjar )

Yuri Muryanto Soedarno *)
Coretan lamunan dari tenggara
pulau terbesar ke tiga di bumi

… waktu malihat
patani tuha menanam puhun
kakanakan mamutiki sampah
uma manyusui anak

urang pintar nang bapandir ekosistem
urang sugih nang bapandir reklamasi
pajabat nang bapandir hutan lindung
tukuh nang bapandir pancamaran
penguasa nang bapandir cagar alam
urang urang nang bapandir taman bumi

nini nang bajualan sayur
kai nang bajualan iwak
nini wan kai nang manaradak banih

urang nang makan dapat matan tung sampah

urang nang bahayau di hutan wan guring
di gunung manjatu kasturi, hampalam, asam, kuini, durian …
urang nang mamutiki kalakai di padang baruh
urang nang manaiki puhun maambil madu
urang nang maambil sarang burung di tabing
urang nang manjipah hiwan tang gunung
urang nang malunta di banyu gasan maulah pakasam, wadi, atawa iwak karing

gasan makan haja …..

urang nang katuju
baulah raga di alam bibas

nang mana nang bangaran pacinta alam ?
nang apa artinya ?

cuba …
takuni tanah
takuni angin
takuni banyu
takuni api

takuni puhun
takuni hiwan

takuni jua matahari
takuni jua bulan
takuni jua bintang
takuni jua planet planet nang lain …

ba apa manakunakan …
quo vadis … wan pacinta alam ?
ba apa dirimu ?
ba apa pian gawi ?

amun kangalihan
boleh haja kada di jawab …

amun tatap manakuni
handak kamana ?
ba apa ?

saku boleh ai
lah di jawab
… balajar …
… balajaran ! .. .

supaya apa ?
supaya balajar kada ba agak .. .
supaya kada sumbung …
supaya balajar kada balabihan wan jubung …
supaya balajar sawajarnya …
supaya balajar saimbang …
supaya balajar mahumati nang lain
supaya balajar randah diri …
supaya balajar kada kapiragahan pintar …
supaya balajar kada pahaharatnya …
karana .. .
sabarataan ampunNYA
nang mawarnai jagat samasta !

makanya …
sudah sawajarnya

kada sarana ba ambil apapun
salain kanangan
wan
kada usah batatinggal salain jajak nang baik atawa putih barasih …

sabab
hati hati banar
bila ampunNYA
mambulikakan …
alam sarik

kada kasandangan
kayapakah liwar haratnya .. .

… waktu ba papundukan
di lambah gunung
asa kadangaran dalam lamunan hayal …

matan …
puhun kayu besi nang tinggi manjulang
umurnya bisa labih talu kali lipat
umur padatuan …
basarang si burung anggang

ada uma anggang wan halarnya
malungkupi maragap
anaknya dua ikung
anggang putra satria laksana perkasa
wan
anggang putri intan juwita lestari
dihiga dahan nang lain
batinggir abah anggang

badua laki bini bariristaan
sambil mencangangi anak anaknya …

umanya …
kayapa anak anak kita ni lah
dimapa inya hidup
kamana lagi inya mancari makan …
busiah buhannya jadi
anggang panghabisan …

kanapa abahnya
pian bepander kaya itu
kada tapat pandiran pian
busiah jadi doa …
kita ini kuitannya
cabut pandiran pian
muhun ampun khilaf wan
Panguasa Samasta

bujur ai umanya
saurang kada karuan rasa
dimapa si Perkasa wan Lestari hidup
bila hutan nang ngini
puhunnya rabah digantal
tanahnya garasang
sungainya karing
udara kada sigar lagi
wan ba bau
karana ada mahluk nang sarakah …

mudahan umanya ai
anak anak kita kada jadi
anggang nang panghabisan
marasnya nasib kita ni umanya ai …

anggang laki wan anggang bini
kada sadar kalu anaknya balum guring
mandangar pandiran uma abahnya

sambil basisigan li’ir banyu mata
anaknya badua

uma abah
tulung doa kan kami
jadi anak nang baik
tulung doa kan kami
jadi mahluk nang baik
kami anak pian badua
kami kada mau jadi mahluk
nang kada tahu di basa
wan luput manggunaakan laku hidup
nang kada dikatujui wan dimurkaNYA
ulih Penguasa Samasta

laki bini itu bacangangan
sambil malihat anak anaknya
maragap banar umanya
sambil balilihan jua banyu mata umanya
di dahan subalahnya
tapancar jua banyu mata abahnya
balilihan jua
gugur manitis
mambasahi tanah …….. .

*). Yuri akrab disapa Cepe / Utuh Iyur, alumni FISIP ULM, salah satu pelopor Mapala Fisipioneer, pernah mengajar di beberapa Perguruan Tinggi dan SLTA. Kadang menulis tentang lingkungan, adventure / traveling, bisnis, opini, puisi, cerpen, fiksi, serta menyikapi fenomena sekitar.

…….
direvisi Penulis Desember 2024
sebagai nasehat buat ananda
Muhammad Yusva Ramadhan
saat study exchange international
ke Nagoya Japan 2024 …
……
Selamat Hari Bumi
22 April 2025
OUR POWER OUR PLANET
KEKUATAN KITA PLANET KITA